Sempal Guyon

SempaL Guyon

Title : PEUYEUM  AIRLINES

Pramugari :        

“Wilujeng enjing kanggo sadayana…

Manawi engké sadérék sadayana ngaraoskeun cepilna katorékan, mangga ditaplok nganggé kapas éta liang cepilna.

Supaya sadayana salamet, mangga tulung perhatoskeun ka dieu, kumaha carana masang sabuk.

Kumaha ngoncina ngarah entong coplok, ngarah pageuh, sareng kieu carana nyoplokeuna.

Baju pelampung aya di handap korsi, ulah dianggo heula, ngantosan bapa Kapten méré aba-aba…Éta teu kéngéng dipindah-pindah nya, komo deui mun dibawa balik, dipaké pajangan di ruang tamu manéh, mun kapanggih dicabok hareup tukang geura, ngarti teu??!!

Éta nganggo baju pelampung, lebetkeun lewat pundak siga maké rompi, konci sabukna ti hareup ulah tarik teuing, engké manéh bingung teu bisa napas! Éta meunang dikeukeupan, nu penting kélék manéh henteu bau.

Ngarah bisa ngambang di cai, tarik éta cenul-cenul warna beureum jambu, manéh kudu inget, narikna kudu di luar pesawat, engké teu bisa kaluar geura mun di jero. Mun ditarik di jero, lantaran ngagelembungna gedé pantona moal cukup, bisa nyangked manéh!!

Mun rék kaluar ti pesawat antri nya, baris siga bébék, siga éntog keur diangon.

Lamun napas geus mulai hésé, éta masker oksigén lagrag sorangan ti luhur sirah manéh. Kop warna konéng-konéng éta makéna saurang hiji, ulah parebut, ngérakeun!!

Kartu petunjuk darurat aya dina selesepan hareupeun manéh, dibaca, teu kudu diapalkeun, bisa gélo manéh ngapalkeun anu kitu..

Kitu heula nya emang, bibi, akang, nyai, ujang, enéng,

Kalakuan ulah anéh-anéh nya!

Oh enya… Mun rék maca-maca, pencét éta cenul-cenul di luhuran manéh. Éta keur ngahurungkeun lampu. Ngarti kan?

Sok ayeunna mah doa ménta salamet, ménta ampun mun loba dosa. Mun pesawat lagrag mah nya wayahna wéh, kudu kumaha deui. Baé wéh lah, da babarengan!!”

Penumpang Pesawat : “!@#$!#$)(*&%{P%$!?@!!!”